360開左咁耐都未去搭過..原因係之前又話要排好長龍等好耐,所以我更加唔會想去...再過左一段時間又成日出事故又係無去到...到夏天來臨就更加更加唔會想去熱死...

星期六難得天朗氣清又唔會太凍, 所以決定去360坐下cable car先...今次先左坐水晶車去坐普通車回程.

去到昂坪市集啦...我地都係行左一陣,都無咩特別..其實昂坪真係要用超平既租金先可以吸引d商戶係果度開店...

相信平日真係好少人會去行...

不過成個市集我覺得最得意就莫過於圖上既樹...大家睇下....佢係假機..d葉真係好假..不過佢用d繩做樹既氣根又幾攪鬼..真係唔明點解要做咁大既假樹係度呢...

經過左市集之後就直上大佛啦..不過影極都影得唔好個大佛像, 後來再去左大雄寶殿, 成個行程就完畢啦.不過當然更係食埋個山水豆腐花先可以叫完美.

不過這度d豆腐花真係正過出面任何一間出名既豆腐花店..大家有機會真係要去試下.

有人為左上堂所以連星期日既part time都推左, 所以上星期日有半日時間見下面行下街...當然我都唔會浪費我去按摩既時間,所以帶埋老闆去按摩就至好不過.

就來係家姐生日,所以又係要搵禮物俾佢既時刻....一心一意要買classic 款俾佢.點知無我想要既顏色又係要留電話...心想都應該唔會有來..不過買唔到袋俾佢就買到野俾自己...

行完街都係時間去食飯啦...之前老闆都已經話想去試西班牙菜,所以我地就走左去EL CID度食啦...估唔到此店D食物都幾好味..唔錯..懶得想既我地更係叫2人餐最為方便又可以試多D唔同既小食..

其實食完個九款小食再加個西班牙海鮮飯已經好飽, 但為食既我地更係要試埋此店既甜品..估唔到甜品都一樣好味..叫左個藍莓雪芭好清又唔會太甜唔錯...

買野真係會令人精神開心d, 上年已經睇中左FL既羽絨, 不過左想右想又唔捨得最後都無買, 今年又原本睇左mercibeaucoup羽絨, 不過身材矮小既我基本上carry唔到d咁型既衫, 最後都係無買.

最後都係忍唔住去買左FL既羽絨, 其實今年d款同上年既款都無咩分別, 不過好岩身另外見到條裙好得意有d毛毛又岩我, 所以都係忍唔住手要買埋佢.

上次見hello connie買既fl leggings話好好穿, 上網訂唔到後來係香港拍賣見到終於都買到真係開心.

.

這次係老闆係OR 搵既食店..係九龍城叫泰地道, 係遠左d不過d野食又真係唔錯....

今次唔貪心叫左2樣野...就岩岩好..叫左個冰火燒牛肉&魚汁米線...我覺得個燒牛肉都係普通野係個名好似改到好吸引咁...無咩特別, 相反個米線真係好得呀..特別個喇沙汁配個米線好正, d魚蛋都好好味..食完都好想快d再來試其他食物呀.

來九龍城都係為左去買大閘蟹食....今晚就決定蒸蟹, 整三杯雞&炒個菜就攪掂..樣樣都易煮岩曬我要求呀.

炒左幾次菜, 今次炒既蒜容白菜仔最滿意..仲有三杯雞都係一樣超級易煮既野..去買隻新鮮雞再加酒, 油膏, 黑麻油..最重要更係加埋九層塔啦..蟹就更加無難度啦..只係洗清潔去蒸就done啦..3樣野花我係廚房既時間都唔洗1小時...咁又一餐

雖然無出去活動, 但咁樣飲飲食食又幾開心.

上星期五見早放工,所以自己一條友去左按摩. 點知按完後老闆就call來話佢都可以放工可以陪我食晚飯...咁有人陪都無咁悶更係好啦...一早已經想去佢公司附近新開既店食魚..

8時多去到都要等左一陣位..好彩唔洗等好耐...2個人叫左泡椒味小邊魚再加多個涼拌青瓜...

個魚原來都係一般既大魚..不過佢地就加左好多配菜如芽菜, 金姑, 芹菜..個魚又話有少少辣..點知都唔辣既..不過都好夠味..d魚都算新鮮都ok架..一邊食下面有個小爐仔熱住條魚都唔錯, 不過如果再凍d來食就比較好d啦..宜家都比較熱所以當日愈食愈熱呀.

如果大家都喜歡食魚, 此店都可以一試...佢地好似都有好多分店.

上星期好無聊好想煮下野食 今次煮簡單西餐就算...突然想食牛扒, 所以去左附近既猫之島買材料...見到有d和牛所以買左2款和牛試下, 上面果款係話日本喎不過肉質會淋d, 下面就係澳洲喎這款係西冷所以肉味會重d.

再買d日本姑姑回家焗就ok

上網睇左用鹽, 黑椒&olive oil醃一陣, 再用平底鑊每面煎1分鐘再反轉, 如果想食7成熟就要反4-5次, 這個方法我都覺得幾得, 2款和牛真係幾好味特別係西冷果款真係好香好好味

我個人就係咁..平時可以成個月.....唔係最少2星期可以唔買野..不過如果一旦勾起條根..我就成日心思思想買野.

..

近期成日都留意下有咩野岩買...亦覺得"mercibeaucoup" d野好特別好靚, 係網見到佢對legging好特別, 最後都忍唔住買左..點知原來睇人穿同自己穿係2回事...我穿左就成對甲組出左來...所以又要去想辦法買d衫睇下點襯先唔會太似甲組球員.

買完又唔知死..又睇中佢新出既jacket背心& OP, 好彩hello connie話我知係CWB有一間水貨店有我睇中既jacket叫我自己上去試...昨日我又走左去專門店睇件OP啦..點知太大件唔岩我D短人...再去埋試jacket啦..我個心亦完全死左..就試水貨店既sales話我穿左都唔得對我來講太大件..好似偷左人地件衫來穿....不過件jacket真係好靚..d毛毛好舒服....

其實近期食到d食既食店都想介紹, 但佢地來既食物又唔算整得好靚無咩特別, 所以最終我都係無影相介紹.不過此店我覺得都ok,所以就影下相介紹一下, 可能大家都去過食,不過唔緊要當分享.

上星期六去左tst行街, 買完野就一心一意要來此店食飯...時間尚早所以有位唔洗等.

我地睇左一陣都係決定叫個2人set dinner試下..不過估唔到我真係幾滿意.

頭盤我地選左salad, 佢個salad就come with 7款不同既dressing,幾特別

主菜有3款選2款, 我地選左唔知咩蛋意大利飯 & 牛臉肉配天使麵, 2個主菜都好好味, 特別個意大利飯真係好似日式蛋包飯, 多汁d蛋又唔會煮都好似蛋包飯咁熟好好味, 個牛臉肉都幾嫰唔會鞋口.

最後就係甜品+咖啡, 我地更係要試下此店既latta, 甜品就係綠茶芝士餅....可能食到太飽我個人認為個芝士餅就麻麻地, 原本佢門口有得買,我未食之前已經決定要買回家, 點知咁岩佢個甜品就係這個蛋糕,試左後覺得唔岩我口味,慳番.

大家有興趣都可以去此店食下飯, 因為此店都用回佢地既瓷器, 所以唔洗買回家都可以有得用下.

近期真係無咩心機,就連平時食到好食既食店都無咩心機影相介紹, 已經開始好似無咩推動力去寫blog, 不過我都希望可以keep. 就好似寫俾自己睇一樣.

近期開始每星期都加插左一天去上堂讀書, 所讀都係投資課程, 可能比較貼身既事情就算放工後再上多3個多小時既堂都唔覺得累, 只令我愈上愈有興趣.

其實ar sir真係在金融界都有d名氣, 所以報讀佢既堂都要等上幾個月先可以讀到.....

希望讀完之後, 真係對我係股票市場上投資有所改進唔會好似以前咁成個盲頭烏繩咁.

平時都係寫下睇咩戲都係懶懶閒唔會即寫架..不過這套戲真係令到我不得不睇完就寫blog同大家分享..

昨日一早就約左去睇戲, 不過我地都知無預早買飛都好難買到飛,所以我都係博一博.其實近期都唔算有咩戲好睇,我心目中都係想睇偽能判變, 點知去度買飛時見到d位太前都唔敢買...咁見到有套叫咩鬼異形既戲~ District 9以為都唔會太差, 上網睇左d影評分都幾高所以我地就決定睇這套.

...入到院開場左一分鐘後, 我就知死就知就算偽能判變要坐前3行我都死去果邊睇好過....成套戲真係好悶仲要成2個幾小時真係攞曬我命,平時睇戲我都唔會周圍轉坐姿, 不過這套戲真係悶到我唔夠十分鐘又轉一轉, 又坐直又訓底轉來轉去都唔知自己想點, 又試過想係戲院入面訓下休息下, 點知又訓唔到, 煩死我...

不過最精彩係...........我都睇左成2小時啦...咁我就見好似套戲仲未想完結咪走出去過廁所俾自己行下...點知去廁所排下隊等左都唔夠5分鐘回來.....................

套戲已經.........完左...真係想番枱...有無攪錯捱左成2個幾鐘都睇唔到個結局...難片一套呀...連買碟回家睇都可以慳埋呀...help me..

p.s..這套戲其實真係有好多人欣賞架, 只係我d膚淺既人真係唔多識睇呀.