香港新浪網 MySinaBlog
JO | 31st May 2012 | 食食食....食肥我 | (154 Reads)
近期成日睇blog睇下人地煮咩食, 滿腦子就係想試下煮這試下煮那, 可惜煮野天分麻麻又加上懶惰, 成日都要搵d簡易既方法先可以.

今次見到一個blog教整素鵝原來咁易, 星期日我就煮下來俾家人食...清清地岩晒我亞媽.

材料:豆腐干2塊, 腐皮2塊, 紅蘿白1小條,冬姑4隻.

調味汁:蠔油2湯匙, 水/上湯4湯匙,糖及鹽少許

燻料:茶葉, 片糖少許

1)將 腐皮加上2杯水, 少少糖鹽同老抽浸下

2)其餘材料切絲

3)將2加埋調味汁去炒到汁差不多收乾待涼

4)將3炒到差不多收乾既醬汁掃係 腐皮內外

5)所有材料包係2塊 腐皮用牙籤封2邊 (盡量包到實d咁樣到上碟d材料先唔會鬆散)

6)隔水蒸10分鐘

7)將燻料放上鍚紙放入鑊中再上蒸架, 小火燻10分鐘關火後5分鐘先取出雪入雪櫃


JO | 30th May 2012 | 食食食....食肥我 | (121 Reads)
一直都想去瀰月屋試下日式和果子, 不過就係提唔起勁專登去北角試.

星期六去行街時無意中俾我見到原來尖沙咀都開左分店, 更係要來試下.

餐牌只得字完全無圖片對我來講都幾困難.

最後選左個一人拚盤 ~ 瀰月三色當中有一個湯果子我選左甘栗, 茶巾同葛軟滋.其實單睇名字完全估唔到係咩來.

等左一陣一小盤既甜品就來, 賣相已經好吸引好精緻!

湯果子有得選凍/熱, 夏天更係選凍啦,  初時仲會想像係好似港式糖水如栗子糊... 估唔到係一個好似清水加幾粒栗子, 睇樣就覺得唔好食..不過有時真係唔可以睇樣這一個湯果子好特別個甜湯唔算太甜內裡應該加左梅去煮所以帶少少酸酸地, 成個甜湯最失敗係甘栗, 栗子只不過係本土貨式煮得唔夠淋偏硬.


葛軟滋味道同賣相都似台灣既羊羹, 配上黃豆粉一起食都唔錯, 清甜!

最後茶巾用左二款既蕃薯打成蓉而成, 應該沒有加糖所以只食得到淡淡既蕃薯味道唔錯.

JO | 29th May 2012 | 食食食....食肥我 | (211 Reads)

知道尖沙咀開左間新既韓燒更係要來試下..更好7時前來到係無訂位之下剩餘一張二人枱總於幸運.

二人選擇, 豬皮, 牛脊肉,鰻魚, 最後再追加一個冷麵

叫完食物後店員即送上一大支凍麥茶; 每一碟生洋蔥, 湯.至於前菜就泡菜, 土豆絲(前菜是無限加添)...

第一驚喜係估唔到個湯係凍湯仲要有D蘋果同紹菜, 酸酸甜甜好醒胃.

至於前菜就比較遜色唔算美味...

平時食韓燒真係無豬皮食, 見到餐牌有這個菜色供應,我同友人都想試下.

此店處理得豬皮好乾淨, 店員說燒好後配上旁邊既黃豆粉食用, 可惜燒後既豬皮一點都唔似我地中國菜既燒肉皮既鬆脆

口感反而就似食香口膠味道都算一般唔係每個人都識欣賞此味菜式...

牛脊肉,鰻魚就唔錯, 二款菜式都醃得入味非常, 就算個牛脊肉過熟都唔會鞋口

第二驚喜係最後追加既冷麵係我最欣賞, 一來就已經成碗出晒冷煙, 碗內亦放入大量既冰,再加上醋同芥辣拌食, 

酸甜既水冷麵令人食慾大增, 而且,麵身好爽身, 簡直夏天必選

最後驚喜係埋單後老闆娘每人送左盒面膜俾我地, 原因係新店開張送既禮物, 真係估唔到食飯送面膜有趣.

PS. 店舖細, 枱亦細, 基本上食飯地方唔舒服, 不過店員細心有禮, 整餐飯亦食得好開心.



JO | 28th May 2012 | 食食食....食肥我 | (57 Reads)


一早已經來到銅鑼灣一心一意早到未夠6時就食晚飯, 原因就想試下豚王既拉麵, 點知想唔到5時45分已經有一條人龍估計都要等上30分鐘以上, 有緣再來.

最後去左SOGO內既UCC食個快餐就算.

友人叫左個SET DINNER ~菠菜帶子炒意粉(包湯, 沙律, 餐飲及甜品)

我就叫左照燒雞三文治大家SHARE食.

湯同沙律都唔洗介紹, 湯友人飲下只覺係罐頭味道, 至於我食既沙律都係粟米薯仔拌成無咩特別

菠菜帶子炒意粉估唔到比起茶餐廳整既炒意粉更油, 估計應該係用上太多PESTO醬汁令到我食到滿口油, 味道都可以, 只係真係偏油.

反而三文治比較好一點, 起碼麵包十分鬆軟, 雞肉都算對板.

整體上食物都OK, 不過可以選擇我都會行前少少去同區附近另一間既UCC. 


JO | 26th May 2012 | 食食食....食肥我 | (106 Reads)

睇OR都知道近期人氣蛋糕非此店既年輪蛋糕莫屬.

 

準備到SOGO血拚前, 排隊買下4件裝作茶點以免血拚途中體力不足.HOHO

 

其實在外已經夠吸引, 同日本一樣用上透明玻璃既半公開廚房, 令到大家可以見到師傅既製作過程.

 

買到手已經忍不住即食一件試下味道如何!!

 

口味并非是我想像中鬆軟入口即溶既口感, 不過愈食就會有陣陣既蛋香味係留係口中, 雖然面層有砂糖係面, 但出奇地又不會太甜

 

小片裝蛋糕既厚度層數比較少, 但已經令人回味

 

相信一整個蛋糕既厚度食落會更加豐富, 下次有機會都會買一整個回家與家人分享




JO | 25th May 2012 | 食食食....食肥我 | (158 Reads)
星期日有時候又唔懶訓(其實真係十年無一次唔懶訓), 整左個無荷蘭汁既egg benedict俾自己食

當然之前整左都失敗左2隻蛋, 之前又係睇左好多blog話落白醋係d水又要整到有個小渦咁樣先得...

最後我係用個煎PAN, 今次無整咩小漩渦呀, 只係放左蛋後即用題將D蛋白快手向蛋黃方向整就OK, 跟住關火浸6-7分鐘.

不過下次大家可以試下Gordon Ramsey既做法  http://www.youtube.com/watch?v=JbAQgJF3d7E

不過一定唔洗落醋架啦.


JO | 24th May 2012 | 食食食....食肥我 | (6422 Reads)

近日又喜歡煮下野食, 上星期睇blog見到原來整咸豬手唔係好難, 無無聊聊就係家整左試下.

我睇左好多blog同食譜最後係將好多不同既食譜左抄右抄, 就得出以下這個食譜

紅蘿蔔      2小條

西芹    2小條

洋蔥    1個

冷藏豬手1隻

月桂葉    2-3片(我家無又懶去買skip左)

白胡椒粒(我又係無用左一大埋黑胡椒粉)

1L水(我又亂來, 只係注滿個煲蓋過豬手就算)

啤酒    2罐(實際用1罐半,所以下次可以買一罐中型SIZE就好D, D食譜係用麥味重D既啤酒, 我見家有咩就用咩)

1)先將紅蘿蔔, 西芹切粒, 洋蔥切大片

2)將水注入大煲再放(1)材料及黑椒煲到水沸

3)將豬手用叉係豬皮上叉幾次令到

4)放入豬手慢火煮45分鐘-1小時(我今次煮左1 1/2HR所以攪到隻豬手燜得過淋,令到D皮破裂,隻豬手唔完整)

5)關火浸3-4小時(其實你有幾多時間就浸幾耐, 不過最少都俾佢浸2小時以上較好)

6)預熱焗爐到220度, 跟住取出豬手浸係D啤酒中間幫下隻手做下按摩

7)如果可以令到豬手直放就企身直放係爐中間, 咁樣可以令到成隻豬手既皮接觸到熱力, 中間每隔15分鐘就噴啤酒係豬手表面令佢更加脆皮, 焗約45分鐘就完成.

食豬手咁油更係要配D PICKLE酸酸地至岩.



JO | 23rd May 2012 | 食食食....食肥我 | (92 Reads)


McCafe既冰雪真係同星巴克既frappuccino差不多

平時都係會叫芒果熱情果冰雪, 不次就試下朱古力曲奇.

面層仲有加上大量whipped cream, 真係同減肥說bye bye.


成杯充滿朱古力香甜加上面層既cream一起飲就更加滑更加甜美.

明知這杯飲品卡路里驚人, 但簡唔中都需要來點安慰. 

JO | 22nd May 2012 | 食食食....食肥我 | (32 Reads)



星期日自己一個人做完FACIAL, 一個人想食下甜品就來此店叫左一個招牌什果河粉.

份量十足, 配料都幾豐富有珍珠, 椰果, 蘆薈及爆炸珠, 加上鮮什果, 芒果汁做底, 

至於河粉就用上蒟蒻造成, 感覺上都健康d....

配料當中令我對爆炸珠有所改觀, 記得以前食過分偏甜, 此店既又味道適中唔錯.

另外個河粉做得好好味, 再配上芒果肉打成既汁, 十分美味.



JO | 21st May 2012 | 食食食....食肥我 | (56 Reads)

上次整富貴雞其實我自己都覺得OK起碼D肉係做到連雞胸都好嫩滑, 不過就好似無咩荷葉香味, 加上我係家搵唔到麵包棒, 攪到我整個DOUGH好醜又有洞, 令到入面既雞汁精華都走晒出來..
集合上次既經驗, 今次再整一次, 失敗乃成功之母
今次亦跟住大少奶既釀料: 豬肉, 甜梅菜, 冬姑, 不過無落蝦米
大家睇下個DOUGH係唔係好靚仔...同埋今次我怕好似上次D汁留出,我買完2塊荷葉再加一層錫紙先再包DOUGH


今次雞細隻只係焗左1個半小時就攪掂, 表面超黑, 底部又軟D所以由底部剪開, 今次有D雞汁令到D雞皮都完整無缺, 開既時候仲有陣陣既荷葉香, 今次既雞就更加滑更加香特別係個雞皮充滿荷葉香味.


因為D梅菜用唔晒, 更係唔好浪費, 又做埋另一個菜~梅菜蒸豆腐又簡單又健康

白鑊炒左D梅菜加少少糖放係豆腐面蒸6-8分鐘落熟油豉油又攪掂再加一個魚湯白菜仔, 開飯啦!



Next