香港新浪網 MySinaBlog
JO | 30th Jun 2012 | 食食食....食肥我 | (62 Reads)

宜家好多食店外賣都要再加多一蚊外賣盒費用, 此店就與眾不同外賣會再減多一蚊.

本身佢地既食物已經好抵仲要減多一蚊真係抵上加抵.

是日叫左個干炒牛河+汽水減價後先$25真係幾年前既價呀...

即叫即炒, 回到公司食時都仲有少少微暖. 

干炒牛河炒得唔錯唔多油, 味道亦岩岩好, 唯一成盒炒河都係得幾片牛肉真係有點似食齋河多d. 



JO | 29th Jun 2012 | 食食食....食肥我 | (56 Reads)

下午4點鐘就入到機場接人, 點知泊好車再查下一班機先發現delay成個鐘mad

成個鐘都唔知做咩好, 唯有去popeyes食個餐先.

2件雞就$36加多$20就有個鬆餅, 薯條同汽水...最後更係屈服叫左個套餐.

$56一個餐絕不便宜, 但心想以前係加拿大總覺得popeyes既雞同食物都係kfc之上, 就算貴過kfc都值得.

可惜以前就係以前仲要唔係香港, 今時今日係香港既popeyes絕對比不上kfc.

成個餐最正常就係包薯條同汽水, 個鬆餅又硬又乾少少牛油味都無, 差呀.

炸雞更差, 成件雞炸得過火乾身一丁點肉汁都無, 反而kfc既雞炸得岩岩好又保持內裡有肉汁.當然價錢亦比大力水手平1/3

好彩等人出來時俾我見到靚仔王力宏, 唔係氣難消. 

JO | 28th Jun 2012 | 食食食....食肥我 | (46 Reads)

其實此店同panash為同一集團, 大家所賣既麵包都係一樣, 只不過此店就供應埋蛋糕.

每逢星期一此店既蛋糕就會8折優惠, 當日買左一件蘋果芝士餅回家食.

面層有幾片青蘋果幾清甜, 不過芝士餅底就一點蘋果味道都沒有, 只是單單既紐約芝士餅, 幸好芝士餅夠香濃美味, 下次有機會都試埋佢地其他出品既蛋糕. 



JO | 27th Jun 2012 | 食食食....食肥我 | (57 Reads)

平時真係好少來這個屋苑附近搵食, 地點真係唔方便.
不過昨日咁岩坐巴士回公司, 早一個站落車順便買個飯盒回公司解決.
叫左個芝士焗肉醬意粉, 估唔到這間細細餐廳都係即叫即焗等左20分鐘先有得取.回到公司打開時都帶微暖加上面層芝士夠多焗完後好香濃既芝士味道, 肉醬份量都算多, 不過味道偏甜無咩蕃茄味道.
意粉軟硬適中, 只可惜內裡加入大量我最唔喜歡既青豆, 攪到我食時十分唔方便.整體個意粉都焗得出色味道都唔錯. 



JO | 26th Jun 2012 | 食食食....食肥我 | (150 Reads)



宜家慢慢都要記低自己煮過既食物而覺得又ok, 咁將來想煮番都唔洗再左搵右搵, blog真係有這個好處.

天氣咁熱最岩就係整涼拌又方便又開胃.

今次整左個涼拌香醋白果雲耳&涼拌茄子


涼拌香醋白果雲耳 食譜:

材料:雲耳同白果

醬汁: 鎮江醋2-3湯匙, 生抽1-2湯匙, 糖1湯匙, 鹽同麻油少許, 蒜2粒

將雲耳浸到發大就連同白果去灼10-15mins, 再將醬汁攪拌放入雪櫃!! done!!

涼拌茄子 食譜

材料: 肥圓茄子1隻, 白芝麻

醬汁: 辣椒2隻, 蒜2粒, 蔥少許, 九層塔(可不加) 以上材料全部切細粒, 生抽2湯匙, 鹽及麻油少許, 糖1湯匙, 白醋1湯匙

將茄子蒸熟, 去皮切條形放入雪櫃.白芝麻白鑊炒香

將醬汁全部攪拌到食時先, 將芝麻放上面再加醬汁完成.



JO | 25th Jun 2012 | 我的食譜 | (331 Reads)

 



其實我係好喜歡食雞翼又喜歡食香口野, 星期六晚訓唔到係度勁睇人地既blog俾我發現有位blog友~東主煮野食好得, 見到佢整左個酸甜雞翼所以我又跟下人煮.

不過這個菜式無難度只要有耐性炸雞翼就無問題...我炸左8隻雞翼跟住留左一半就做個酸甜, 另一個就無加醬汁只係放左少少芝麻係面.


酸甜雞翼食譜:

雞翼剪一半

醃料: 鹽, 糖, 生粉上面.

醬汁: 茄汁2湯匙, 李派林喼汁1湯匙, 糖,1-2湯匙, 鹽少許, 水2湯匙(我喜歡酸,所以加左白醋1-2湯匙)

步驟:1)雞翼剪後就醃, 到要炸時上生粉

2)炸第一次後, 灘凍再回鑊炸多一次

3)將醬汁放落鑊煮一陣再放雞翼回鑊令到每隻雞翼都沾上醬汁, 完成.

 

 

 



JO | 25th Jun 2012 | 食食食....食肥我 | (161 Reads)

難得家人出外旅遊, 屋企無人最岩就係請埋幾個好友來我家攪個大食會.

每人煮一個餱, 當晚既餐單如下:

1)蝦仁炒蛋  2)西芹炒雞柳  3)蕃茄薯仔碎牛肉湯  4)菠蘿薯仔蛋沙律   5)煎西冷扒+肉眼   6)焗德國豬手  

5個人5餱1湯, 白飯唔多, 最後仲要加左個蘋果酥配自製橙雪葩

中午時分大家一起食埋lunch同買左材料就回家. 雖然星期六落得勁大雨, 但係我地5條傻皮都去左泳池游左一陣水.

回到家個個都勁肚餓就開始勁食第一道菜沙律, 再配下uno吹下水hea 下, 7點準備煮野食, 8點就食飯, 飯後即興再焗埋個蘋果酥大家食, 咁易就10點幾, 大家都拖住疲累既身軀散band!




JO | 22nd Jun 2012 | 食食食....食肥我 | (140 Reads)
難得東大街開左間新甜品店, 咁我這個甜品怪更係要來試下.

星期五晚8時半左右到達, 幸好早到一步免得等位.

店舖細細最多同一時間只能容立20多人左右, 當然坐位亦唔會舒服.

我地叫左宇時綠茶涼粉及好立克冰配MOVENPICK雪糕, 老實講來此店都沒有太大期望只是新店想來試下, 不過這裡既甜品真係同區來講真係較為出色

綠茶涼粉加上紅豆, 個甜品既綠茶好香濃幼滑配上綿綿紅豆, 真係一口接住一口食唔停.

雖然宜家綿綿冰口味推出多款不同口味而且好立克味亦唔係什麼特別, 但覺得此店既好立克冰本身做得比出面更細緻唔會食到冰粒, 而且冰露加入椰果粒又增加冰露既口感, 反而再加上粟米片同MOVENPICK雪糕好似成為配角.

單單試左這2款甜品已經令我想再來試埋其他甜品, 希望此店能夠為持下去.


JO | 22nd Jun 2012 | 食食食....食肥我 | (58 Reads)
係銅鑼灣我至愛既甜品店就係聰嫂, 覺得佢地真材實料, 簡唔中將當造既水果做甜品限期供應.

就算平日既晚上此店都是是爆滿...星期四晚8時多就開始要等位, 幸好等左唔夠5分鐘就有位.

我叫左個芒果椰果冰, 友人就叫左薑汁芒果豆腐花.

其實芒果椰果冰就係由荔枝椰果冰變成, 不過用左芒果肉打成冰就更濃, 再配上芒果肉, 椰果少許西米有點爽口. 

至於友人既豆腐花充滿薑汁, 豆腐花內又係加上芒果肉同芒果冰由芒果既香甜去沖淡左薑汁既辛辣真係一個好好既搭檔.

其實此店都應該擴充, 店子太細坐位亦唔舒服.


JO | 21st Jun 2012 | 食食食....食肥我 | (37 Reads)

好耐都無來香河食牛肉河, 平時至愛就係此店既牛肉河粉, 覺得河粉夠滑湯夠清甜.

星期四晚, 上完堂同朋友來食, 7時半到達都唔洗等位.

2個人叫左個生牛肉河, 蝦檬同炸軟殼蟹.

是晚既食物真係有點叫我失望. 首先牛肉河既河粉唔知係唔係換左供應商d河粉以往係幼身好滑, 今次來既河粉似平時粉麵店既粗身重點係一d都唔滑溜好失望, 牛肉亦唔嫩偏鞋口.

印象中以前既蝦檬係蝦餅來, 但今次就送上幾隻蝦仲要一分為二, 又唔彈又無蝦味, 食碗齋檬無咩大分別.

成晚最好就係炸軟殼蟹, 件件都夠肥美仲有蟹膏炸得甘脆.



Next