香港新浪網 MySinaBlog
JO | 30th Nov 2012 | 食食食....食肥我 | (67 Reads)

以前既松記真係令人覺得價錢公道之餘糖水甜品亦算創新美味. 

之但係宜家香港地甜品店開到好似便利店咁多既時候, 如果唔再努力都幾難令人再幫襯. 

不過此店都唔怕吸唔到客, 有偉大既強國人光顧又可需進步改進呢? 

是晚來此店食糖水真係有點令我止步, 相知有一段時間都唔想再來. 

點了芒果世界, 友人就要左幻彩明珠. 

餐牌中既芒果世界亦另加上2小碟芒果汁及椰汁, 但來到時2小碟既醬汁已經自行加在甜品內. 

只可惜芒果汁非常少而椰汁就非常重手, 令到整碗甜品都好重椰奶但又沒有椰香, 而且愈食愈膩既感覺. 

再加上甜品內既白色粒裝糕點亦無味道, 加上芒果汁唔夠芒果本身亦唔算清甜, 完全失望. 

幸好友人既幻彩明珠味道依舊, 勝在夠多什果作點綴.


JO | 29th Nov 2012 | 食食食....食肥我 | (42 Reads)

有一段時間都無來香河, 原因唔係佢地D食物唔好, 係好似來來去去都係這些菜式有點悶.


前二日友人突然話要來此店食飯, 點知當晚就發現佢地換左新餐牌真係開心.:)


我地點左煎扎肉凍檬, 牛油田雞及茄汁牛腩配麵包.


凍檬內既扎肉其實唔係煎而係炸, 炸得有點乾身不過味道就出奇地美味,再加上佢地既魚露這個凍檬真係唔錯.


再來既茄汁牛腩同樣出色; 茄汁唔似完全用上支裝茄汁, 應該再加上新鮮蕃茄令到汁有點鮮甜, 而且牛腩炆得好淋身配上法包非常美味.


最後既牛油田雞應該係新增菜式, 一碟份量都幾多, 而且炸得份外鬆脆而不油膩, 田雞肉仍然嫩滑可口, 唯一美中不足就係沒有足夠既牛油香味.


JO | 28th Nov 2012 | 食食食....食肥我 | (72 Reads)

約左友人係附近食飯, 突然想食拉麵係東大街只想起八雲. 

將近8時店內唔算多人被安排坐到卡位, 座位都幾舒服. 

每張枱都提供一藍熟雞蛋, 只要大家喜歡食幾多都可以完全免費. 

我選左牛油拉麵; 友人點了咖哩吉列豬扒飯套餐

我既拉麵附上一大舊牛油, 當牛油遇上熱湯慢慢溶入湯中, 飲湯時會帶點輕微牛油香. 

麵質都算軟硬適中, 但湯底就偏淡如喜歡食濃味既人士這個湯可以未能滿足. 

材料都算豐富, 有大量粟米粒, 海帶及筍, 再加上二大片肥瘦適中既又燒, 以$58來講都算合理價錢.

至於友人既咖哩吉列豬扒, 友人都算覺得唔錯, 是日式帶甜既咖哩香味而豬扒肉質都算鬆化炸得甘脆而不油.

整體上食物及服務都算唔錯


JO | 27th Nov 2012 | 食食食....食肥我 | (35 Reads)



食完晚飯又點會錯過我至愛既甜品.


明知廣華街都開左幾間甜品店, 見到此店都幾特別, 以學校為題材用記念冊做MENU, 枱椅都係以前返學既書枱都幾攪笑.


點左個西瓜大少...這一個用左半個迷你西瓜做內裡有D西瓜肉打成西瓜冰再加上涼粉, 椰果等


西瓜唔算好甜還可以, 幸好椰果本身偏甜令到整個甜品不至於無味道, 不過用西瓜肉打成既西瓜冰就略縑味道偏淡而無味.


整體上這個甜品都只屬一般, 而且價錢亦偏貴.


JO | 26th Nov 2012 | 食食食....食肥我 | (564 Reads)

星期六晚走左去旺角睇相機, 預先已經搵家OR有咩好介紹.

睇到此店食評唔錯又有羊腩煲, 我地未夠7時就來搵食.

2個人胃口麻麻只係叫左個羊腩煲就算.

此店既羊腩煲係時價, 細問之下當日要$228, 其實都屬偏貴不過一心一意就係想食都無計.

地方都幾大冷氣亦好充足, 坐得都算幾舒服可能早唔需要點搭枱. 

個煲一來已經聞到好香羊肉味道, 羊肉份量都好多2個人真係叫一個已經食到好飽. 

材料亦好豐富有支竹, 馬蹄, 冬姑等樣樣都好入味,

羊肉正宗黑草羊, 肥瘦適中羊腩炆得軟腍入味帶少少羊羶香

整個煲還加上多款不同香料如果皮等做個湯底醬汁, 平時食羊腩煲會愈滾愈咸及好油膩, 但此店既羊腩煲湯底醬汁味道適中而不油

食完之後都覺得收二百多元都叫值得


JO | 24th Nov 2012 | 食食食....食肥我 | (58 Reads)

因為要接機關係, 所以決定來東涌OUTLET行下街順便食埋飯先接人. 

真係順行左2小時後大家無咩收獲就決定來和民食晚飯. 

估唔到佢地有個2人餐又多款式, 我地懶得想之下就叫左這個豐盛二人餐. 

先來係個溫泉蛋沙律, 再來3款小食(薯條, 雞串及三文魚) 

這個沙律只屬一般溫泉蛋整到大半生既情況下蛋白仍然好生, 感覺怪怪完成都唔想食, 而且沙律菜亦唔算新鮮再加上大量既沙律醬汁, 這個沙律真係麻麻.

反而3款小食當中以三文魚算叫合格最起碼三文魚夠肥美鮮甜, 其餘二款小食都麻麻薯條雖然炸得金黃而不油, 但薯條好硬應該炸得過火. 而雞串送上來時內裡仍然凍冰冰真係有點嚇人.

幸好再來既主菜都算唔錯, 牛肉鍋牛肉片夠嫩亦有牛肉味, 加上鮮甜既蔬菜這一個牛肉鍋都算合格. 

再來既滑蛋豬扒飯亦唔錯, 上層既滑蛋多汁加上炸得香脆既豬扒非常美味, 而且底層既飯沾上少少蛋汁及醬汁令到整個飯都好有味. 

最後既蒜蓉蜆鍋算係我地最滿意既菜式, 有大量既蒜蓉及蜆肉鮮甜令到個湯底好甜美. 

整體來講這一個二人餐都算抵食而且豐富


JO | 22nd Nov 2012 | 食食食....食肥我 | (43 Reads)

與友人專登來跑馬地熟食中心大排檔搵食

原本一心一意以為大排檔應該有羊腩煲食, 點知2間都沒有供應. 

我地選左係銖記食就算, 反正覺得2間都應該差不多. 

對上一次來已經係相隔4年, 記得以前來時人多又迫, 反而今晚就變得冷冷清清. 

不過水準依舊,我地點左半隻風沙雞, 金姑腐竹瑤柱煲, 鍋貼小棠菜. 

第一次食這個鍋貼小棠菜炸得非常香脆, 而且蝦肉彈牙再沾上泰式醬汁用來配酒一流. 

另外金姑腐竹瑤柱煲亦令我滿意, 腐竹好新鮮好香豆味, 再用上蠔油汁燴入令到原本無味既食材更加香濃. 

最後此店既招牌菜之一既風沙雞炸得外皮香脆, 雞肉都算嫩滑多汁.


JO | 21st Nov 2012 | 我的食譜 | (229 Reads)

功夫湯(菜乾白菜豬肺湯) 

整個湯只係事前清理豬肺比較麻煩之外, 其他步驟都係簡單易處理.何況宜家去街市買豬肺好多肉店都代為清理豬肺, 買到回家再出水都已經變得更為簡易. 

材料:豬肺一個(叫肉店代為啤水清理及切件), 菜乾, 白菜適量及蜜棗2-3粒, 豬骨一件 

1)買回來既豬肺清洗後, 白鑊炒過豬肺, 這時鑊中會出好多白水, 跟住再將豬肺再沖水, 再回白鑊再炒(這個步驟重覆3-4次) 

2)豬骨飛水, 菜乾浸發清洗 

3)煲內注入6-8碗水加入豬骨先煲15分鐘, 再加入其餘材料煲2-3小時關火加入少許鹽調味即可.


JO | 20th Nov 2012 | 我的食譜 | (160 Reads)

隨意齋用這個名真係好貼切, 因此這個齋真係好隨個人喜愛而變化, 你喜歡用咩蔬菜材料及份量都可以係自己決定又無特定, 只不過如果你份量多/少既話, 南乳都要自行加減

材料: 竹生, 枝竹, 雲耳, 金針, 冬姑

調味料: 南乳3磚+糖2茶匙+半茶匙水

鹽半茶匙

1)先將雲耳, 金針, 竹生浸泡後, 再將雲耳, 金針, 竹生及枝竹飛水揸乾水

2)冬姑加入生抽, 糖, 麻油醃後先蒸15分鐘

3)落油先爆香南乳調味, 再加入其餘材料大滾後轉細火再炆到醬水收水


另外如果有時間我覺得這個齋可以早一日煮定, 到第2日翻熱就更加入味.


JO | 19th Nov 2012 | 我的食譜 | (411 Reads)

一旦愛上搓包就好似不能自拔, 成日都心思思想搓包整下這個包款整下那個包款

星期五晚半夜三更又搵下食譜來整包, 明知一早又要起身番工, 但我都係決定要整, 反正我用冷藏法只係花半個小時左右搓包唔會好耐啦.


今次整個漢堡包食譜如下(2個)
高粉100G, 
黑麥粉25G
依士2G+水50G
奶60G
糖7G
鹽2G
牛油10G

1)將依士+水攪拌待10分鐘
2)其餘材料(除牛油)加入1搓勻
3)搓致麵團光滑再加入牛油致薄膜
4)包上保鮮紙靜待15分鐘
5)麵團放入保鮮袋放入雪櫃一晚
6)從雪櫃取出麵團回室溫待15-20分鐘
7)排氣, 分割, 搓圓再搽上蛋汁/水, 灑上芝麻
8)再發酵1小時
9)預熱焗爐180度焗15-20分鐘

豬扒
用生抽, 糖, 酒醃一晚,再煎二面至熟放在漢堡包內




 


Next