香港新浪網 MySinaBlog
JO | 13th Dec 2012 | 食食食....食肥我 | (122 Reads)

今晚又同BLOG友CONNIE出來搵食, 其實識到佢都算係一種緣份. 

一年一隻手都數得晒, 不過每次出來食飯都有傾有講非常開心. 

今日我地去OR又一熱門餐廳 PIZZAZAZA, 這點位於大坑店舖細細, 提早幾日前已經BOOK位幸好都算有位. 

當晚我地2個人做足功課,所以點餐時一點困難都無只係點回網上好多食評家介紹既菜式就可以. 

頭盤要左個流心蛋薯蓉, 店員送上菜後亦會細心作介紹. 薯蓉內亦加入黑松露, 店員介紹可以將蛋汁與薯蓉及黑松露攪拌後一起食, 薯蓉好奶滑及稀身, 所以唔會太飽肚, 有黑松露既關係所以味道亦好香濃, 不過是否需要加入蛋黃汁則見仁見智. 味道是特別, 不過個人覺得價錢偏貴. 

來得此店都會點個PIZZA試下, 這裡有2款用全麥麵粉做餅底既PIZZA我地點左個牛肝菌, PIZZA餅底好薄而脆身, 就算用上全麥粉都唔覺得太鞋口, 味道唔錯, 只係覺得牛肝菌味道唔突出, 相反芝士及蕃茄醬味道非常濃郁. 

再來係時令意粉~蟹粉意大利粉夠晒FUSION, 不過我覺得物不所值. 意粉無錯煮得非常好不硬不軟好欣賞, 但唔知係唔係蟹粉關係令到整碟意粉都有點腥味.如果以三百多元來講, 我覺得一點都唔值, 相信下次再來都係點回餐牌內既意粉試下還覺值得. 

雖然已經好飽, 但我地都忍不住試埋甜品先收口, 點左個CHURROS, 這一個甜品係我地2個人整晚最欣賞既菜式真係估唔到.

用上肉桂炸後既CHURROS再加上砂糖, 中間再放上栗子蓉.整個甜品都非常美味栗子蓉香濃奶滑, 唯一我個人覺得CHURROS炸得有點過火而偏硬.不過整體上這個甜品夠獨特而出色. 

其實這間食店食物做得好好, PIZZA亦美味, 只係有些菜式個人認為有點OVER PRICE, 不過食物同價錢都係好個人.至於環境都唔錯而且服務都唔錯, 不停會有人加水又會換碟, 非常細心.


JO | 12th Dec 2012 | 食食食....食肥我 | (131 Reads)

睇完戲後, 係商場內睇下有咩食好食. 

最後見到井井屋當然要來試下, 單單係店外POSTER既魚生飯已經好吸引.

2個人點左一個魚生飯及滑蛋雞肉飯一起食; 另外一個餐就加左$15就有一客沙律, 小食及麵豉湯.

先來既滑蛋雞肉飯已經非常吸引, 見到個飯既滑蛋屬半生熟仍有蛋汁在面層, 如果怕生又可以同飯一起攪拌將飯既餘溫令到蛋慢慢變熟亦可以.

不過我同友人都喜歡有D蛋汁既半生熟, 這個飯完全合我們心意.

雞肉亦夠嫩滑加上飯吸受晒蛋汁及雞肉既味道非常美味.

再來既魚生飯同圖片有D唔對樣, 不過幸好味道亦算美味. 魚生切得大大粒而且新鮮肥美, 而魚子亦脆卜卜帶香甜.

整體上每樣食物都非常好味加上價錢相宜, 下次有機會都會再來試下其他食物.


JO | 11th Dec 2012 | 食食食....食肥我 | (64 Reads)

星期六又係一整日要留係公司 

中午就走去IKEA食個午餐, 都未夠一點已經要排隊點餐 

見到有個小食拚盤都係$29有粟米, 墨西哥卷, 蝦多士及香腸好豐富岩晒我. 

可惜食物味道認真麻麻, 當中最差算係個墨西哥卷皮又硬餡料係薯蓉又無味道

而粟米同樣無味; 蝦多士算合格只係底部既多士已經變軟身了. 

最正常算係3條迷你香腸.


JO | 10th Dec 2012 | 食食食....食肥我 | (204 Reads)

從來都無好認真研究希慎內有咩食店, 昨日無意之中見到誠品內有間TEA ROOM好似幾吸引

昨晚就相約友人來食個晚飯. 

時間尚早既關係, 整店只得我地2個人. 

晚飯選擇唔多只有幾款SET DINNER可供選擇, 講明係TEA ROOM真係專做飲品等, 食品真係其次. 

我點左個香辣牛肉關廟麵跟薯仔忌廉湯及百香果凍茶; 友人就點左個雞肉燉飯跟煙三文魚沙律及四水果茶 

先來每人一片微暖少少鬆軟麵包加上香滑牛油非常好味; 而我既薯仔湯亦好香濃加入忌廉就更加幼滑. 

再來既主食就係友人既雞肉燉飯單單睇個份量真係偏少, 不過味道做得相當唔錯. 

雞肉嫩而底層既燉飯應該加入雞湯一起烹調, 所以每一啖飯都充滿雞湯味道非常清甜, 再加上黃蘿白有點爽口好配合.

其實2款既主菜都非常美味只可惜份量極其少, 對於我這名大胃王來講真係食完等於無食咁.

至於主攻茶品既TEA ROOM理應茶香, 可惜我點既凍茶只屬一般唔算清香甘甜, 如果用正常價錢每杯要花上$70以上才飲到這杯凍茶完全覺得不值.


JO | 8th Dec 2012 | 食食食....食肥我 | (52 Reads)

食完餐晚飯完全唔覺飽, 自己都忍不住要去食個超HEAVY既甜品先得.

知道SOGO BASEMENT開左間雪糕店, 我叫左個綠茶芭菲杯. 

初時見到店員係度整個芭菲杯時以為底層加上冰塊再加入綠茶, 後來先知果D唔係冰塊係大菜糕來. 

再放上雪糕及紅豆再加上雪糕及4粒糯米滋. 

其實賣相就非常吸引, 可惜味道就可以話差. 

先講面層4粒糯米滋偏硬味另一款有綠茶粉在面就更加難食綠茶太濃又無味道.

而中間既紅豆茸就偏甜, 最重要係雪糕就太重牛奶味但就唔覺得香濃幼滑.

食到底部只餘下無味既大菜糕就更加愈食愈唔想食.

這一杯芭菲杯要$38, 份量算多但味道就奇差, 相信試一次已經好夠.


JO | 7th Dec 2012 | 我的食譜 | (124 Reads)

第一次整既17小時中種既合桃包縑佢發得唔夠好, 一直都要再試過都未有時間試.

這個星期就決定要試, 一早係星期五晚已經搓好中種雪左整整1日半時間, 到星期日就取出來整包用.

今次發酵得好好亦算滿意

食譜:

中種(前一晚搓好放入雪櫃)

高粉: 187G; 依士:4G; 水107G; 鹽2G

搓到光滑放入保鮮袋雪一晚

主麵團:
1)高粉:53G; 裸麥粉32G; 鹽2G
2)依士2G; 糖40G; 水30G
3)牛油/菜油 10G
4)合桃/其他乾果隨意

將中種由雪櫃取出放室溫15MINS, 再切小粒
將2材料攪拌待10MINS
再加入1中搓至光滑先加入3搓到有薄膜
包上保鮮紙發酵至1倍大
取出麵團排氣, 壓平加入4再混圓打靜止10MINS
這時將模灑上裸麥粉, 再放入麵團發酵1小時.
預熱焗爐180度焗30MINS
(食譜COPY FROM  BLOG~KESTREL)

hh5


JO | 3rd Dec 2012 | 食食食....食肥我 | (78 Reads)

食完好正既生牛肉河後, 行經此店見到好多人又忍不住8下有咩食物吸引. 

見到佢地有一盒盒蘿蔔絲酥餅買, 一盒4大件只係$11, 真係相當抵食. 

回家即刻就要試一件, 老實講初時對這個酥餅都無咩特別期望, 點知世事就係咁無期待就有驚喜. 

這件酥餅外層真係做得又酥又鬆又唔會油膩; 內層既餡料十足好多蘿蔔絲又香又甜.

每件都唔洗$3有咁既水準, 下次都決定要試埋其他點心.


JO | 1st Dec 2012 | 食食食....食肥我 | (92 Reads)

唔係睇有篇介紹都唔知道北河街街市內有個熟食中心亦唔知道裡面有間越南野食市咁受喜歡. 

1時多來熟食中心環境算係我去過多個熟食中心最唔清潔既一個, 而且地面又滑真係要行得步步為營. 

這店就係熟食中心最尾部, 只得9張枱, 而此店亦係場內最爆滿. 

點左迷你生牛肉湯河配青檸梳打; 而友人就要左個香茅豬扒+風沙雞翼凍檬配凍檸茶

此店既亞姐服務非常好, 見到我地2個人明知SHARE來食就給予我地2個小碗, 又知道客人多怕有漏單又會幫客人對單怕D數目錯等

係熟食中心有咁既服務真係令人覺得好意外. 

講番食物, 我地點左既生牛肉湯河, 此店既湯底係我試過覺得最清甜而帶牛肉味道, 而且河粉好滑牛肉岩熟再加上佢地提供既新鮮薄荷葉令到成碗粉味道更清新. 

再來既凍檬同樣出色, 此店除左提供自行調配既泰式魚露外還額外提供炸香蒜, 這2樣調味加入凍檬內增加風味而且佢地既豬扒醃得入味肉質鬆軟,雞翼外皮脆. 

最值得一提係佢地既青檸梳打除左有濃郁既青檸鮮甜外還加上香茅. 

此店除左價錢平外, 服務好食物佳唯一就係環境真係算差, 坐位亦相當唔舒服