香港新浪網 MySinaBlog
JO | 30th Sep 2015 | 日本福岡鐵路之旅 ~2015 | (28 Reads)

16.09.2015

來啦來啦...今日係我地連續3日都坐火車既第一天...其實安排這個鐵路旅程都好多變化...平時我係果D我計劃左就希望盡可能跟到我計劃去做既人,但人愈大就知道世事無如意, 只要識感恩有既變化未必唔係一件壞事...而這次就算我一早換左火車票到最後一天我都係將火車票換完又再換先完成這個鐵路之旅.


今日已訂既火車行程, 亦係唯一一天完美咁樣完成左..
火車時間                                                                          火車名
博多HAKATA(6:23) - 別府 BEPPU(8:33)                    SONIC 1
別府 BEPPU(13:12) - 由布院YUFUIN(14:16)              YUFU 4
由布院YUFUIN(17:07) -博多HAKATA(19:17)            YUFUIN NO MORIE 6


由於我地坐6:23AM既火車, 我地5點幾就起身亦預早30分鐘到車站買早餐同搵月台...
題外話...其實去旅行搵旅伴係一件好難既事...做得你朋友又未必可以同你一去旅行., 我聽唔小去原本好朋友去完旅行回來大家可以反面收場.
我知自己麻煩加固執, 而友人就有選擇困難..所以大家既缺點係對方就成為左優點..HAHHA

所以我往往都係我計劃行程友人就做最後確認地址(查地址), 再完全跟住我個PLAN去玩啦..而大家都係怕誤點, 所以一般我地去機場, 坐車都係預早20-30分鐘以免中間有咩出錯...

我地2個都預早既人, 所以未夠6點已經到左火車站, 一早就預定去買donut作早餐, 再入車站買杯咖啡我地就入月台啦.

今日係坐SONIC 883呀...好型既藍色!!



車廂係咁....但我既睡意蓋過我既熱情, 同埋我今日最期待係由布院之森既火車, 所以我都無去其他車廂度行. 坐低飲左杯咖啡就開始訓啦...有2小時車程我都不付所望咁訓左大半程. 起身落車時精神晒..不過出車站就見到出面落好大雨啦...
但一別府站西口就見到我想坐既2號巴士都唔問巴士司機做確認(平時我係會架),應該係我未回魂又上落大雨加上我上車前見到佢個牌有寫鐵輪2個字, 所以就上左車.
而友人就更係開佢個GPS去確認.(都話大家確認方法唔同架啦)

坐左20分鐘友人就話到左海地獄. 而我既失魂又發作, 以為自己去海地獄, 所以叫友人又落車.
但明明我就話去左浸溫泉先再參觀...而且我個PLAN都無話參觀海地獄, 而係去灶地獄及鬼山地獄!!!
友人都吹我唔脹,跟左我落車...幸好我平時都有D小狗運(一定唔會係友人架啦)..落車果度係最近我要去既2個地獄, 所以我地就決定去左參觀再去浸溫泉會比較舒服D, 原來咁行程就變得更加順暢.







因為我睇左介紹話如果唔參觀晒所有地獄既話, 最好就來灶地獄係話這個地獄集合因為這裡已同時有6種地獄景觀, 加入入面加入浸腳同食野, 所以第一站就來..雨都開始細但講真落雨時份又真係無咩心機行啦..只係隨意影左幾張相我地就走入小食亭浸左腳再叫左個魚串同牛奶試左(不要希望D野好好味, 牛奶亦一般)就走人...前後唔洗20分鐘就KO一個景點.

 

跟住行出去過對面就係鬼山地獄啦...現在開始無咩雨...初時一入去都覺得無咩好睇有個鱷魚館咁..究竟同溫泉水有咩關係...不過好彩咁岩入到去無耐就聽到叮叮聲跟住有廣播啦...我第一時間更係就走出去睇下咩事..原來鱷魚放飯時間到..當日人唔多好易就搵到好位睇下佢地點樣搶食...


 

我同友人都覺得如果唔係遇岩佢餵食時間, 基本上這個地獄就更加無野睇...佢地除左搶食時會郁下...如果唔係都係靜態!!

 

 


 

這隻全場最老既鱷魚唔知點解俾人隔離左..唔通佢成日要訓所以怕D細既嘈佢..HAHHA





 

好啦這裡都係20分鐘KO完...咁我地就可以去搵溫泉浸一浸鬆一鬆...

其實計劃行程時就係怕D地獄會好吸引想睇下幾個但又想浸下溫泉, 但好與不好之下我地2條友對景點真係唔算好大興趣, 而且天氣唔好不如去休息下..

 

找這間溫泉最大吸引我係佢有個砂場...我從來都未試過真係好想試...幸好友人係度用GPS成功帶我去到!!YEAH!!

這裡入場費好平就算我地去埋砂場都係1080yen一D都唔貴...而且入面都有幾款溫泉最正係有個露天既出面下雨涼涼地令我地想起去大阪時一邊落雪一邊浸溫泉既爽快!!

 

如果大家有時間來都可以順便來浸一浸真係好抵玩. 個砂場都好正架..焗完之後唔知係心理定係真呢..覺得成個人都鬆晒..再去浸溫泉就更加正.

 

提供這個網址俾大家參考

www.hyotan-onsen.com

 


 

我地玩左1小時左右啦就走人啦. 雖然唔係好多時間享受, 但我地已經係好滿足咁離開. 我地行番上巴士站度見到有去別府站既就上左車啦...又係坐左20-25分鐘左右就到啦...我地係車站既food court買左盒炸雞炒麵上車食完又開始再訓...真係好豬既生活!!


 

訓左一輪就到由布院啦啦!!!不過雨勢都無減弱..


.我第一個目的地呀...B-SPEAK既蛋糕店呀...衝呀!!!!我都唔理咁多向前勁行一見店無人排隊就滿心歡喜入要買個細蛋卷先...心想今日又落雨都應該唔會賣晒啦!來到時有2對人客, 但個個都係問有無細卷. 個COUNTER已有個板已寫明細卷已經賣晒, 只見雪櫃都係得幾十卷大既...
咁鬼為食既我都明知大卷2個人都唔會食得晒, 但我都唔想就即買一卷...
最攪笑我心急到即場係店再要開餐隊個蛋卷..點知食左一啖就俾個店員話唔可以係度食..HAHAH嚇到我都即刻收埋D野走人..果個日本人應該未見個咁既餓女!!
不過食左一啖之後我個心就係一直想要搵咩位隊多幾啖條蛋卷呢??這個蛋卷真係好好味, 一打開未食已經聞到好香既蛋味, 而且蛋糕超鬆軟忌廉又唔膩...係真係令人心思思想食...就算下次我一個人去都會買呀!!


其實來由布院我只係為左坐下果由布院之森火車同埋買蛋卷食. 初時仲想到如果係店買唔到蛋卷, 我最後一程坐火車都可以買啦..點知上到火車都見唔到有這條蛋卷買既..(可能我又無問啦)


我地買完蛋糕就向金鱗湖出發...行下又開始細雨D..去到時就差不多又停雨啦...影左一陣相就走人...再行下旁邊既店鋪又開始落雨仲愈落愈大...岩岩俾我地發現有個地方好岩我地坐底隊蛋卷喎..發達啦...2條友仔隊左2/3個..我真係太低估自己既食力...HAHHA..食飽又凍又落狗屎就開始回車站等車好過..點知經過一間自助式既cafe入去想買杯茶仲要係take out...點知果個亞叔真係怪呀..我同佢講要1杯茶外賣啦..佢話我2個人入來要2杯...咁不如你直接D啦話唔做我生意啦!!
係屋台又係咁來到由布院都係咁..係唔係福岡人有型D啦...下次不如寫明只招待日本人啦..咁唔洗我盲仲仲哄入去自討沒趣!!

番到車站等多陣就可以上車啦..而果時D雨又開始停啦...又可以影下相.


 

一上車我地就開始行晒成架火車啦...當我地行到上車頭時見到成個玻璃見到出面架火車開始入森林咁好靚!!嘩..坐係車頭D人真係幸福可以一直咁望到咁靚既景色!!唔知點樣先可以坐到車頭位置呢??

當我地回到自己座位時, 友人就開始要訓啦, 佢仲要問我點解唔訓...我仲好勁咁講我要等小姐攞個版來影相呀!!

點知...最後我自己都訓埋!!!@@

好彩友人岩岩果時起身仲醒目地叫醒我, 再叫番小姐回來幫我地影...雖然有D未訓醒咁樣, 但我已經好開心!!

 

 

番到博多, 今晚我地就係地下街度見到有回轉壽司解決!!(忘記影相!!)

食飽行一陣又回酒店休息!!

 


JO | 29th Sep 2015 | 日本福岡鐵路之旅 ~2015 | (71 Reads)

15.09.2015

今日既行程都唔係好多選左...

博多菅乃屋 - 坐地鐵到福岡姪浜駅- 去行左電單車店 - Marinoa City Outlet- 回中洲Owl Family - 博多站食晚餐

今日唔洗好早就起身, 事因我要等11點去博多站既菅乃屋食馬肉. 咁慳既我更係會選擇食午餐啦, 相比晚餐會平一半架...原本打算去熊本食架, 但因為D火車時間好似唔就我既行程...最後選擇係博多同一間分店試左去就算...準時11點我地就入去...HAHAH當然我地係第一枱客...坐唔夠一陣已經好多日本人入來食Lunch...佢地既午餐又真係好抵平均都係1800yen起最貴都係2800yen..真係好抵食呀!!

這間店有一個識講國語既日本人, 所以上菜時佢都會為我地介紹下D食物

 

我地叫左個5款馬肉刺身+壽司, 另一個就係馬肉燒烤...講真呀每樣菜式都好精密...連簡單既南瓜都可以整個葉子形出來....我試左5款既馬肉最估我自己唔到就係食到馬肉既脂肪..不過這個脂肪有別於平時我地所理解既脂肪, 這個脂肪層燒左都唔會出油, 爽爽地又唔油架..真係好好味...至於其他部位對我來講差不多...

 

嘆完餐咁正既午餐先係4880yen..食飽我地就去坐地鐵去姪浜駅...陪友人去電單車店行下睇下有無野買...點知都係預左空手而回, 而下一站就去Marinoa City Outlet, 而由店行去outlet同我地行番佢站砸再坐巴士係差不多, 所以我地決定行去outlet...這個Outlet叫近福岡不過店舖D野都唔算好岩我地2個...最後我地係去左藥房買左D野就決定早D趕去下一站中洲Owl Family...

 

6點3我地就去到...旅行前就send email問有無得預先訂位點知店主話無..所以我地當日來都係撞下彩, 怕多人架..我地入到店先問下我地入唔入得先..因為佢地係叫一杯飲品包你坐1小時既...但我地6點3先去到又怕佢唔俾我地入...幸好店員都俾我地入去不過都係7點就要走架啦...(我地估啦)

入到店有2層, 第一層就已經見到有十幾隻貓頭鷹, 跟住我地就上樓...店員幫我地消毒對手同俾左個指引(有英文, 日文同中文)大致上係點樣對待貓頭鷹, 要用手背掃佢地背呀..唔可以點前身同頭, 影相要關閃光燈等...

 

因為當日我地係第一對客人, 跟住唔夠10分鐘就有對日本母子來啦...基本上只有我地2個有好多時間玩下貓頭鷹同慢慢同佢地影相(因為對日本小朋友係無去影過相, 個亞媽簡直無離開過2樓)

 

我地落到去其實只有5隻(大, 中, 小SIZE)貓頭鷹可以俾我地摸下, 同埋可以放係我地手, 其餘果D只供影相..其實佢地真係好可愛有2隻BB貓頭鷹仲會不時咬人...我地坐左大約30分鐘影完相就準備走人...點知我地臨走時先發現原來果日本小朋友係帶佢自己既貓頭鷹來店做護理...

其實這裡收費真係唔平..我地2個人飲杯野就每人1500yen..

 

出來都差不多7點我地又回博多車站, 因為我地昨晚見到有間店有活魷魚食呀....我地就叫一條魷魚刺身啦..再叫左條燒魚同埋這裡出名既牛腸鍋(這個唔記得影相)

HAHA活魷魚上碟時個頭同尾都仲動架...真係好勁...佢地都只係切左個身俾我地食, 至於個頭同尾咁多肉, 佢地會問你要唔要加300yen做天婦羅, 如果你唔要佢都係成碟會收起去..你都無機會想食呀..何況咁大舊真係好難咬得開..我地更係加錢食埋去..出奇地天婦羅魷魚比起刺身更加好味..不過2者既魷魚都係無咩鮮甜味道...再來亦可以不試..

 

至於燒魚就來紅衫魚..味道都唔錯...

 

最後無影相既牛腸鍋我同友人真係唔識欣賞..D牛腸好肥呀好油...幸好個鍋有大量椰菜食下..至於個白味噌湯真係好油呀我都唔敢試啦...

 

埋單先知這餐個牛腸鍋原來係2位價錢計, 所以這餐都唔平相比中午既馬肉真係覺得這間唔值啦.

 

食飽啦!!又乖乖地行回番酒店順便當散步...明天要一早坐6點既火車, 我地都要5點幾起身架啦....回去又到浴場浸完浴就訓啦..為明天鐵路之旅開始作好最好狀態!!!

 


JO | 29th Sep 2015 | 日本福岡鐵路之旅 ~2015 | (18 Reads)

14.09.2015


終於都等到去旅行, 今次係中午1點飛機, 但我地都預早10點半左右到機場...行李寄倉後我地就入閘...因為廉航無野食, 所以我地入左去lounge食野...唔洗錢既無咩要求啦...醫好肚我地又就出去行下一陣就等上機...多謝上天照顧我地準時到日本啦...福岡機場唔大, 但等過海關都等左20-30分鐘啦...出到來買支茶打散準備坐2號巴士到博多...

因為我地住既酒店行去博多站都要15分鐘呀...坐地鐵又要轉免費巴士再轉又上又落好麻煩, 反而坐巴士個站仲近D又唔洗行咁多..雖然車無咁密但我地都唔急...費時上上落落仲辛苦

去到酒店都成7點左右, 放低行李後我地就要行番去博多站換JR PASS同整埋車票..不過為食又肚餓既我地更係要入7仔食左個關東煮先..我地發現7仔既關東煮好味過Family Mart好多...下次都要記得..

食完先有力行去車站架...好彩我旅行前就整左份時間表內有火車時間, 火車名...所以我地去到counter都唔洗再寫一次, 直接俾張紙佢地幫我整就可以認真方便...所以大家如果想慳番D時間, 旅行前最好查清楚自己行程同坐咩火車咁樣去到又唔洗左問右問..唔知係唔係9月呢我安排既主要既2個火車都坐到..認真開心...換好票攪好晒..我地就出發去屋台一心一意就係想試下..



我地係去中洲屋台既...去有十間店舖左右選擇, ..其實間間食物都係差不多啦講真又無咩特別吸引我食呀...不過心想都來到就試下啦...我問左2間之後掃晒興, 決定轉地方求其食算啦...因為第一間就話只有拉麵, 但明明佢就係有串燒...我地就係唔想食拉麵只係想食串燒...好啦就行去對面馬路見無咁多人..又再問一間都無人等位又唔滿座...問佢這個仲勁只有天婦羅...又係個櫃一大埋串燒...唔做生意我都無得勉強架...算啦..我地走啦行去第2度搵食..

亂行一通去到中洲川端商店街有間24小時食店, 見到佢地樣樣野細細份又多選擇,岩晒我啦..我地今晚就係度解決啦, 出奇地今晚我地2個都好滿意,好平架但味道唔錯...特別個梅子茶漬飯呀好岩我地食呀!!



唔識睇日文更係看圖點菜架啦..點知個炸物係炸牛篣又幾好味, 個餃子雞翼都好得架...樣樣細細碟岩晒我地唔算好有胃口既人...食飽就回酒店啦事關這間酒店附有大浴池...雖然唔係溫泉,水, 但當每晚行到好累既時候, 去浸下又真係會成身鬆一鬆.

今晚就早D訓啦..明天我地都係市區行下shopping下.

JO | 29th Sep 2015 | 日本福岡鐵路之旅 ~2015 | (45 Reads)
一年2次既旅行, 今個9月已經用埋最後一次quota....宜家人老左物慾真係相對愈來愈少..所以今次出去都係休息下行下食下野...我同友人勁到去旅2個人先得15KGS, 回程2個人先得27KGS.
仲要大多數都係去藥房幫家人買野多, 自己都係少...我連一件衫都無買呀...真係成個亞婆咁..

雖然今次買唔到好似人地幾十元就有張機票, 但我地為起來每人都係$1500左右都叫抵啦...幸運地來回機程都無遇上delay. 回程仲要早左5分鐘呀幾叻!!!

交通: 如果唔係廉航推出既平價票, 真係唔識來福岡旅行亦唔會研究下原來佢地既特色火車咁鬼正...旅行前做好功課查好晒火車班次同要坐咩火車...我今次買既係北九州3日火車票, 鎖定要坐 ASOBOY 同由布院之森而且係JR加價錢一早係香港買定個PASS果度又慳左.....

食野方面~福岡之旅我地今次都無咩食貴野, 只係去菅乃屋食馬肉刺身, 但中午相比晚餐平左一半..其餘就係去左食左個牛腸鍋可惜2個人都唔識欣賞...

 

行程方面, 我地都唔係好多野睇...對D咩城咩城我地2個無興趣, 而去別府浸左溫泉加砂谷真係好爽, 去由布院就第一時間去搵蛋卷買就算細卷買晒, 2個人明知食唔晒我都要買一大條隊..至於味道更係超正..真係好好味..不過如果有細既小食多滋味會更好.

其實最恨就係上阿蘇火山, 點知出發果日就話阿蘇火山爆發左啦...我都死左心無得睇啦..不過幸好都坐左2次ASOBOY火車...

另外去旅行從未試過踏單車, 今次我地去左有田就試左...好爽呀!!

 

行藥房我都算夾盡價, 初時以為車站附近有間24小時藥房會平啦..不過原來熊本有2間藥房仲平...加上去前搵左間日本藥房既coupon, 所以額外多3%優惠...至於好多人都話係東京, 大阪等攪免稅都等到傻, 反而係福岡都無係我身上發生, 就算熊本多香港人呀..我地都係得一間要等一個客人真係shop得好舒服

 



這個就係我地6日5夜洗費.

機票 3,664.00
 酒店 2,283.05
 交通 JR PASS 1276.7
活動 310
食 3600
手信 7588
 其他(Insurance) 176
 Sub Total 18,897.75
 總計 (每人約 $)9449

JO | 29th Sep 2015 | 我的食譜 | (8 Reads)


 

因為我家係潮州人..所以每逄中秋都會將芋頭去拜神..見到咁多芋頭就用來試下攪埋整杯野飲試下對唔對味先...估唔到整出來又真係唔錯..如果大家喜歡芋頭味既一定要試下...

食譜請CLICK入以下網址:

http://cook1cook.com/recipe/18053 


JO | 25th Sep 2015 | 我的食譜 | (9 Reads)

友人係馬來西亞買回來既咖哩粉真係好香好好味, 今次就用來煮蔬菜同樣地咖哩汁都係咁香咁好味, 單單用左1湯匙就已經好足夠好香又唔會太辣...今次再用來拌自家意粉咁又一餐夠晒方便..

P.S想知道自製意大利粉食譜可以CLICK入以下網址
http://josearfung.blogspot.hk/2014/06/carbonara.html

 食譜可以CLICK入以下網址:

http://cook1cook.com/recipe/18010 


 


JO | 24th Sep 2015 | 我的食譜 | (5 Reads)

以前出街食完飯必定要拉埋友人食埋個甜品先心息....但睇左好多報導都話食甜野對皮膚又唔好對牙又唔好...加上宜家出去係咁易食個甜品分分鐘貴過一個正餐, 攪到我開始都減糖行動...之但係人就係咁...太約束有時都想食下...縑街既甜品貴呀..咪自己整啦...再三放縱就係梳乎里上再加雪糕一冷一熱真係好爽!!

 

食譜請CLICK入以下網址:

http://cook1cook.com/recipe/18003 

 


 


JO | 23rd Sep 2015 | 我的食譜 | (11 Reads)



今次這個泡菜餅用左好少油, 但都可以煎得外脆, 煎左咁多次最滿意就係今次...近期食多左就改一改唔加海鮮唔加肉, 只係多泡菜再加入金菇同樣美味

 

食譜:

http://cook1cook.com/recipe/17985 


JO | 22nd Sep 2015 | 我的食譜 | (29 Reads)




這個蠔湯用左半包廣島蠔再加入蔬菜粒一齊煮, 每一啖都充滿蠔味非常好飲..

 

食譜:

http://cook1cook.com/recipe/17973 


JO | 11th Sep 2015 | 我的食譜 | (11 Reads)

 

家中無戚風蛋糕模, 但我就用左戚風方法用上蛋糕杯做...出來既效果都一樣鬆軟美味...做法亦同樣簡單只要打發蛋白時做得岩就唔會失敗架啦.

其實我自己測試蛋白霜打發夠唔夠除左會起勾外, 你倒轉個盤佢都唔會跌落來就OK

 

這個蛋糕係我半夜訓唔著做架, 由整到焗起唔洗1小時就攪點晒...做完仲可以做第2日早餐...認真方便

 

 

食譜:

 

http://cook1cook.com/recipe/17789 



Next